▫ وانت صغير تضرب ود جيرانكم وامو تسوقو من يدو وتجيكم في البيت وتشتكي منك، ناس البيت يشاكلوك قدّاما،وبعد يمشوا يقولو ليك هو اصلا شافع الجيران ده قليل أدب بركة الدقيتو!!! أول درس في................. النفاق ***
▫ وانت صغير عشان ماتحوم بالليل يقولوا ليك الواطه كلها مصايب والبعاتي بلاقيك!!! أول درس في ...............الخوف ***
▫ لمّا اخوك الصغير يتعلق في شئ ويبكي اخوك الاكبر منكم يناديه ويدخل يدو في جيبو وهو فاضي عشان يجيهو!!! اول درس في................. الغش ***
▫ لمّا مرة الجيران تنادي بالحيطه لي امك وتقول ليها الليله ماجابو لينا شطه من السوق ادونا شطه وامك تقول ليها جابو لينا كدي النديك حبه منها وبعد تديها تقول ليك المره دي جنها شحده كرهتنا!!! أول درس في................. البخل ***
▫ لمّا يكون عندك صاحب بتريدو شديد لكن ملابسه وسخانه حبتين وامك تقول ليك اوع اشوفك ماشي مع الشافع الوسخان ده!!! أول درس في............ألتكبّر والسطحيه ***
▫ لمّا يكون ود جيرانكم سمين وملظلظ وحليوني وشاطر وامك تشوفه تقول ليك عاين ليهو عامل كيف!!! أول درس في..................الحسد ***
▫ لمّا زول كبير في الشارع يضربك لانك عملت غلط ويجيبك البيت بتبكي واهلك يشكّروهو ومجرد مايطلع ينزولو فيهو شتايم ويقولو لو بأدب كان أدّب اولادو!!! أول درس في..............النفاق و الغيبه ***
▫ لمّا تمشي عرس في الحله مع امك وماتخليك تاكل مع الشفع وتقعدك جنبها وسط النسوان وتحشيك ضلع!!! أول درس في.................الأنانية ***
▫ ولمّا جيرانكم يتشاكلو وامك ترسلك امش شوفهم مالم متشاكلين!!! أول درس في ...........التجّسس والخسه ***
▫ ولمّا واحد يكون طالب ابوك قروش ويجي يدق باب بيتكم وابوك يعاين بالحيطه يشوفو ويرسلك يقول ليك اامش قول ليهو ابوي طلع! أول درس في.................. الكذب ***
▫ ولمّا زول كبير يرسلك مشوار بعيييد ،ولّا يناديك تشيل معاهو شي تقيل وناس البيت يقولو ليك مالك ومالو!!! أول درس في ..............قتل روح التعاون
***
▫ ولمّا يجيكم ضيف ويمنعوك تاكل او تقعد معاهو شان ماتحرجهم!!! أول درس في .................عدم الثقه ***
▫ ولمّا أبوك يكون مفلس و أمورو جايطه ولو رمشت بس يدقك ويجوط فيك ويحاسبك علي القديم والجديد والجاي!!! أول درس ......................خلط المعايير ***
🌹🌹🌹 ▫ هكذا نربي اطفالنا ونعلّمهم النفاق ..الخوف .. الغش .. البخل .. التكبّر .. السطحيه .. الحسد .. الهروب من المواجهة .. النفاق .. الغيبه .. الأنانية .. التجسّس ..الخسّه .. الكذب .. عدم التعاون .. عدم الثقه .. التحمّيل و خلط المعايير ....الخ .
▫ ثم نطالبهم بعد ان يكبروا ان يكونوا : شجعان .. كرماء .. واثقين من انفسهم .. متحملين لمسؤلياتهم .. أصحاب حارّه .. وصادقين...إلخ .
▫ ولكن هيهات هيهات .. وما نيل المطالب بالتمنّي .
▫ عليـنا أن نعلـم :
✍ أنه ليس بالخبز وحده ولا بالمظاهر يحيا الانسان .
✍ أن اي سلوك يبدر منا امام اطفالنا سيحدد توجه معين بالنسبه لهم .. لنتجنّب الازدواجيه .
✍ لذا فالنراقب أنفسنا ونعيد صياغتها مع كل كلمه وكل فعل .. من اجل انفسنا .. اطفالنا ..وأمّتنا .
ليتنا تداركناها ... ....... فلنتفكر ........اخطاء تربوية في الأسر *********************
